Ingridsløyfa – ei meiningsfull festsløyfe
Ingridsløyfa, pryda med ein sølvbinders, er meir enn berre eit dekorativt element til 17. mai-feiringa. Denne 17. mai-sløyfa ber med seg ei sterk og viktig historie, og me gler oss til å fortelja denne til heile Noreg.
Norsk motstandssymbol
Under andre verdskrig, i tida då Noreg var under tysk okkupasjon, fekk bindersen ein spesiell symbolikk.
Den tilsynelatande ubetydelege bindersen, med si grunnleggjande funksjon å «halda saman», vart omfamna som sjølve symbolet på samhald og fellesskap.
Bindersen vart festa på jakkeslaget som ein subtil måte å visa dette på, og som ein stille protest mot undertrykkinga.
Heilt utan fare var det nok ikkje. Det var nulltoleranse for alle former for motstand, og ein risikerte både bøter og fengsling om ein vart oppdaga.
Me må snakka om samhald
– Me må snakka om samhald, har designarane og gründerane bak Ingridsløyfa hevda sidan lanseringa av sløyfa i 2019. Designduoen Hanna Høiness og Bjørn Bye ønskte å skapa noko meir enn berre festleg pynt. Ingridsløyfa minner oss om den norske motstanden under 2. verdskrig og framhevar det viktigaste med nasjonaldagen; samhaldet, fridommen og demokratiet.
Då er det ikkje så rart at Ingridsløyfa traff det norske folket så sterkt, langt inn i hjarterota, og har sidan den gongen pryda mang eit bryst på nasjonaldagen.
Ingrid er eit gamalt norsk namn som betyr fred, velstand og vakker, og er samanfallande med verdiane som denne sløyfa heidrar.
Norsk historie, norsk handverk
Sylvsmidja tek no over stafettpinnen og skal laga Ingridsløyfa i verkstaden på Voss.
– Sylvsmidja er tufta på handverkstradisjonar og nasjonale, kulturelle verdiar, og det kjennast naturleg for oss å formidla samhald som verdi, seier Trond Syversen, dagleg leiar på Sylvsmidja.
Sylvsmidja har også mange andre 17. mai-sløyfer med ulike motiv. Sjå alle sløyfene her.
Samhaldet bind oss saman. Det er ei kjensle. Ein styrke som løfter. Ei bevisstheit som veks. Det handlar om fridom og mangfald. Om respekt og rettferd.